POESIA KANG MISS CELERINA TURLA

POESIA KANG MISS CELERINA TURLA

ING WAMBI KUNG MAESTRA

(My Grade I Teacher)

A Tribute by Rodrigo M. Sicat

Bula’ning Hunyo petsang nineteen sixty four kanita

Inyang itang kanakung papel de baptisimo yang pelad nitang kanakung ima

Kang Miss Celerina Turla a pikabalwan king kaganaka ding sabla

At king pamanurung wambi alang anak ing e misaplala’t mitutula.

Ketang muna keng akit i Miss Turla atna kung takut ka ya

Bala ku rugu ena ku yural at akung tanggapan ketang klasi na

Uling Hunyo kanu dapat pitu na kung banua

Uling Agostu ya pa ing beitan ku, anya, ing irad ku alangan ya pa kanu ana.

“Munta ka keni” anang minepe kanaku

“Abutan me ing balugbug mu” ana pa kanaku

“Mamintu ka” anang inang ku kanaku

“Magislbi na ka” ana ng Miss Turla kanaku.

Meko ne inang ku, melakwan na ku king kuartu

Pepalwal na la ketang handbag ku retang papel at lapis ku

Meg-umpisa kaming gugulis angga keng mebiasa na ku

Kaibat ning paruminggu, itang lagyu ku agugulis ku neng mautitu

Mapilan aldo kaibat nita, detang  “a, e, i, o, u” ilang tiru na kekami

Aldo-aldo pasulat yang tya metung letra kareti

Munaman, ilang pabasa nang tunggal-tungal balang kanakung kaklasi  

Bayu muli manabilin ya kekami “magsane mamasa ban mika-mastery”

King kelwatan ning pamanyulat at pamamasa

Metalas na kaming metalas, metalustus na kami king sabla

“I Bagul”, “ I Tagpi,” at “King Dane Mi” ilang minuna nang pepabasa

 Anya, “Very Good” at “pikpik buntuk” ilang premyu at pabuya na.

Sinane na kaming mamilang karetang myaliwang “devices” na

Mialiwa-liwa la itsura, e la pare-pareu kule pa

Ating mabilug, ating atlu-suluk, atin mu namang kwadradu

Ating asan, ating ayup, ating sampaga at myaliwang insektu

Aldo-aldo, dumi-dumnggu, bulan-bulan atin yang ituturu

Yapin angga ngeni, itang tiru na maka-anad pa king ukul ku

Pamanyulat, pamamasa, pamamilang at pamagkanta

Deting sabla simula at inubug na la nitang maestra kung i Miss Turla.

 Dakal a dakal salamat pu maestra ku

Utang mi keka itang belwan ming mumuna

Salamat ketang kekang tenam at pinunla

Salamat king kekang tyaga kekami ngeni mamungang masaplala.

King kesyasan ding buntuk mi, deti alang sawang pigmasabalan yu   

Uli niti, meging bantug ka karing pusu ding anggang memaryu

Migit pa kaniti, pinili mu kami kesa ketang sarling kaligayan mu

Pauli mi, eka mikyasawa, meging mapamintu ka king aus ning Apung Guinu!

Ala na ka dapot maybe ka pa

Uli ning masamyu at dalise mung kaladwa

E ka mi mu mapilan kayanakan ding kekang inaruga

Nune deti, e mu la abilang uling katakata la.

Inyang ika nang inaus ning Mayupaya

Sayang pu eku man abalu, eku man mekapagadya

Sana, nung abalu ku mu, agawa ra ka mu mang makuyad a tula

A magpatiman mu man keka nung eka man tumula.

Balu mi ing ala kaming dapat pigaganakan, alang dapat pikakunwan

Uling balu ming sabla nung nakarin ngeni itang kekang karinan

Karin king labuad ding Angeles at Santos ning Kayarian

Nung nukarin la manuknangan, karin ka mu naman magluluklukan

Atyu na ka banwa, atyu ke pa yatu

King mayap mung kabilyan, panalangin mu pa kami

Yawad mu king Mayupaya ing itaid nawa kami

Karin king pusu Na a mipmung pamagkandili!

Madam, salamat pung pasibayu

Mapalyaring kalingwan yu kami dapot ikami, ali pu

Maging matatag ya ing yatu pauli ding tau a kalupa yu

Kawangis nitang dalit tiru yu kekami ketang WAMBI ku

“Mamun na ke pu maestra, datang kami naman pota…..”

2 thoughts on “POESIA KANG MISS CELERINA TURLA

  1. Pingback: poesia kang miss celerina turla: ing wambi kung maestra « siwala nang sinukuan

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s