Nung Makananu Minuli Kung Talasawa

NUNG MAKANANU MINULI KUNG TALASAWA

Dr. Rodrigo M. Sicat

Dakal lang sasabi at maniwala, ing pamakyasawa kanu anti ya waring kamatayan a daratang king bie ning ninu man tau. Iti eku lubus paniwalan ketang bayu ku pamung tau (baintau) anggang ing tune nang kabaldugan dinatang yang anting alisus kanaku.

King katatawlian, akung sasabi kaniting kanakung sarili, tutu ya pin pala ing kasebyan a piyamanuan ding makatua! Ing pamakyasawa anti waring kidlat ya! E muya man piadyan, iti kabud datang ya keka.  Eka man maka adya, ampitan at ampita’na ka.

Iting pamikatagun, aku iting aranasan. Nung bigla aganaka ku iti, matula ku yang pipiling-piling ing buntu’ku potang pasibayu kung babalikdan nung makananu minuli kung talasawa…

Misan abak king trade school (Don Honorio Ventura College of Arts and Trades) king balen Baculud, iya ping kanakung pipagobran, metung yang office memorandum ing kanakung disan at ausan ing prusisu kung pamamunta keta king Office of the President. Iting panabilin, malagua ku yang lingunan, at akung marapal mekikit king kekaming presidenti. Pablasang king trade school bayu-bayu ku pa mu kanita, ing presidenti dakal ya pengutang kanaku. Kaya nang pekibaluan itang dikil king kakankung gagawan karin king Guidance Office, at mu naman, kareta pang aliwang kanakung kagiyuan king pamanyaliksik at pamanuru. Maluat itang kekaming pamisabi at aku na yang gelamanuan kaibat nitang masanting at malalam kekaming pipagkuwentuan. Memun kung masaya lupa, migpasalamat king pamuntuk ning kekaming escuela, at ume nakung mibalik pasibayu ketang kanakung opisina. Antimong alang nanu, kanakung sindu ing likuan a gagawan ku at aku pang sikasuan itang obrang aliwa pa.

Kalulukluk ku pamu karetang gamit yadia ku, itang kekaming janitor mayli na yang inabut kanaku, itang pirmadung administrative order nitang kekaming College President. Aku na yang tutulduan antimong bayung technical staff ning escuela king Center for Interinstitutional Research and Policy Studies (CIRPS) ding State Colleges and Universities in Region III. Iting aguman, iya ing peka think tank ding sablang state colleges and universities keti Kalibutnang Luzon, king pami-puni karing miyaliwang alituntunan ding mamuntukan kareting mesabing pipagaralan.

Bisa kung sanang murung, dapot ala kung akarapat uling iti utus na ya ning kanakung presidenti. Mabilis kung mibalik ketang kayang opisina at malugud kung migpasalamat kanitang tiwala a pigkalub na kanaku. Bayu kami mikawani, kaya na yang inabut kanaku itang bayu pang memorandum, nung nukarin, akung tumagun ketang seminar-workshop at CIRPS technical staff meeting, maganap king farm school (Pampanga Agricultural College) king balen Magalang keng October 23-25, 1986. 

Kanita eku malili papunta king farm school, akung mekisabi king kekaming Presidenti, yang akung maki yagnan karela o kaya, karing kekaming kayabe pang aliwa. Akung mekisabi kaniti uling iting escuela eke binang kabisadu.

Dinatang itang aldo ning kekaming pamaglako at pablasang Kapampangan kaming pare-pareyu atna kaming kasayang mipamiru. Pasadu alas otsu nitang abak, king farm school ning Magalang, masalese kaming miras. Akung lawe-lawe at matunud magumasid karing sabla uling nung ali kanita, aku pamung miras kaniting lugal atna kalwalas bina. Ala kung kakilala karing tau, nune mu detang kayagnan kung menibat Baculud. Manibayu ku man, ing sabla kanaku ngan panigaralan. Aku lang akilala detang miyaliwang technical staff ning CIRPS at detang miyaliwang Presidenti ning Region III. Malugud dakung tinggap detang kanakung kayabe king grupu, at aku mu namang pepakilala da karing presidenti ning Central Luzon. Kanita mismu, aku nang titu ra nung nanu ing kanakung maging obra. Kanita mu rin, simulan kung masaya ing obrang mitutuk kanaku, at e migluat, detang kanakung kakilala, ilang miragdaga’na.

 Metung karing obrang mipaniwala kanaku, iya itang akung maging facilitator ketang lecture a magagampan ketang penandit ita. Kaniting mararapat a gagampan, detang makasulat dang kutang ding participants kanaku lang titipunan at yayabut ketang moderator, kanita, itang tagapagsalita ilang pakibata’na.

 Kaibat nitang mumunang workshop, ding sabla ume lang mengan paugtuan. Akung menintun karetang abe ku Baculud, kanita, akung makyagnan mangan karela. Masaya at matula kaming mipamalita. Anang mengutang kanaku nitang kekaming abe metung:  Rod, ninung kakilala mu Tarlac College of Technology? Ala kung balu, akung kaya mekibat. Pasibayu, aku pang mengutang kanitang abe ku: Nuya karin ing Tarlac College of Technology? Atiyu ya Tarlac! anang mekibat kanaku. Bakit balu daka? Bakit pangutang da ka lagyu at nung talasawa ka kanu? Eku balu, akung karela sinabi. Nukarin ya wari ing Tarlac? akung mengutang pasibayu.

Kabang matula kaming mikukutnanan detang kayabe ku, ume danakung dinakit detang kayabe ku CIRPS, kanita, kekami la pang pisabyan detang kekaming miyaliwa pang gampanan kinabukasan. Kaibat meyari nitang kekaming pulung, kanaku lang belikan pasibayu detang kanakung likuan kayabe Baculud. Ala na kung disan metung man karela, ita pala, minuna na la kanaku, ban magpainawa na ketang kekaming tuknangan dormitoryu. Eku balu nung nanung daptan ku, eku balu nung makananung miras ku ketang dormitoryung misna dayu. Itang lugal kanaku da yang tiru, dapot nung munta kung dili-dili, mekad mawala ku at malili kung siguradu.

Mayap namu naman, atin saken kule asul itang tinulid kanaku. Ilang mengutang at migkusang lub, nung karela buri kung makyagnan uling ilang papunta mu naman ketang lugal a kanakung panintunan. Kasake at kalukluk ku, kitnan daku nung nanu ing kanakung lagyu at nuya karin itang escuelang kanaku penibatan. Kapampangan mu naman ing karelang salita, dapot itang karelang tonu, makatibis ketang matarling kung gege. Kanaku lang matulang pakiramdaman, uling detang karelang lupa, masaya lang kawangis nitang kanaku. Mangutang lang miyaliwa, at aku namang makibat matula. Kabang kukutnan daku, isipan ku nung bakit alang patna itang karelang buring abalu kanaku at pagtakan ku mu naman, nung bakit ala lang gigigit ampong mipangandut potang kanaku lang pakibatan detang sari-sari dang ikukutang. King kanakung kapilubluban, akung matulang mamiru king kanakung sarili: Ay, marayil uling menasa lang babai at siguru, kakasantingan la kanaku! 

 King tula ra, aku lang apapagumasdan detang mipipingkilan dang siku, at makanian mu naman, detang mata rang kindat-kindat atnang kapamiru. Karetang karelang pamilayun karing mapamiru dang pamaglalawe, ating lulub king kanakung isip, marayil, makapatungkul ketang dalagang matayimik makasiping kanaku. Dapot king wanan ku makalukluk ya iting abe dang dalaga, eku ya man apapansinan, uling detang kayang kayabe, makagiyam lang pakisabian. Pablasang ing dalan kekaming bibeben malipugpug ya, itang malagu nang lupa nitang dalaga, kaya nayang tatakpan ketang panyu nang malutu at pane makalawe ketang marayu. Eya bubulad, uling siguru, mikakunu ya kanaku, at ala yang kabalu-balu tungkul kanaku. Pablasang detang kayabe na purus lang mapamiru, iyang pelakuan da king siping ku, dapot peluklukan naman keta mismung kayarapan ku. Sinagakgak lang lalu pa ketang kayang pamintu, at kanakung pagtakan nung bakit ing siyo da atnang katni king tula. King karelang kimut, mamyalungan ku isip, at king kanakung ukul, balamu, iyang ibabage da kanaku. Ketang masapsap dang buring malyari, ikaming piyarap da, at detang kekaming mata ikua rang mikit, kinislap at misabi.

Aku yang linawe at aku namang linawe. Makatiman ku lupa at mangalutu ya itang kaya. Maratnang lawan-lawan ku ya dapot duku-duku ya. Akung magpakilala kaya dapot mikakunung makibat ya. Aku lang sipat-sipatan detang mabilug nang mata dapot ketang salamin nang malutu-lutu, deti kaya lang tatakpan malaguang-malagua. Itang kule nitang kayang balat, kaku ya mu namang pigumasdan, ay! kabage nitang kayang kule ketang imalan nang berde! akung sinabi king kanakung sarili.

 Kabang lalalam itang kanakung lawe, akung apapansinan itang malalam nang pangisnawa. Eku kukurap king pamaglalawe kaya, uling eku la buring matda sala detang mamanga kung mata kaya. Kanitang penandit, ala yang laman ing kanakung panimanman, nune, itang lalu ya pang asilayan. Uling bandi na ya niting kakung pamaglalawe, ena balu ning dalaga nung magpildis o malis ya ketang lugal pilulukluka’na. Ena naman balu, nung itang susulud nang baru, kaya na yang panabitan o pulisan o kuskusan o samasan, kanita, aku nang tuknang lalawe pa kaya. Marayil, uling eku ya patugutnan lalawan, iya nang isipan, ing aku nang yugse lual ning saken, kanita, akung mawala ketang karapa’na. Dapot, nung nanu itang kayang panga-inipan, iya namang ikakawili nitang mayayama kung sarili. Kabang luluat, tutung ali ke awari ing kibul ning pusu ku. Tatatap yang alang patna, pupukdul yang alang nanu. Bakit kaya ing pusu ku makanyan yang mamanga, balamu, iyang mamumulang at masisira!  Bakit kaya eke arienda ing kabug ning kakung pusu? Malsinta ya pin kaya kening dalagang ngeni na pamu a katagpo at ing lagyu naman ena pa balo?

 Kaburi ku yang ipilpil iting maliswas kung pusu, dapot, nanu ke mang itimpi, lalu yatang mikakapali. Buri keng itali, dapot, lalu yang magpatabili. Buri keng dukutan, dapot, lalu yang sasalikut. Buri keng dakma, dapot, lalu yang maglumpasag. Buri keng sakalan, dapot, lalu yang lulundag. Akung mangutang kening kakung sarili: Bakit eku balung ipalino nung bakit ing kanakung pusu aku na yang ililindu? Bakit ing kanakung pakiramdam tuliru yang tuliru?  

Kabang iting dalaga, kanaku ya pang pagumasdan, lalu ku ya pang angaan, lalu pang paninapan. Detang pitiris-tiris nang bitis, kaku lang lalawan, kaku lang batya-batyawan… kasanting da at kakaba, aliwa lang aliwa, uling king bie ku yata, kanita ku pa minangang minanga. Tutu kung mawiwili… tutu kung mayayama… tutu kung miyuyu king lawe ku kaya… Marayil, mua at masusora ya kanaku uling detang kanakung mata atna lang kapamuska. Dapot iya nang makasibaktung kanaku, kaya ku pa lalung mamanga uli nitang buak nang makaba. Akung sinabi king kanakung sarili: Ay, kabage nang kabage ketang buak nang makaluge! Uling akung makalawe ketang buak nang makaluge, kaya ya iting kinaul at sepunggul, at iti kaya yang pinusud. Pasibayu, akung sinabi king kanakung sarili: Kalalu na pang mibage ketang malagu nang lupa… lalu yang metingkad…lalu yang melagu…! Metung ya waring kandidata ketang ligligan detang musa… alang malyaring sumambut  kaya king tikas at dagul na…!

 Kaburi keng akaket! Kaburi keng lalawan! Kaburi keng pag-umasdan! Kaburi ku yang talanan! Kaburi ku yang apisan! Kaburi ku yang uman! Marayil, nung malyari mu, iti kanakung depatan inggiang ikadalum o ikasukul ku man! Dapot ita eku gewa uling kanita, metung kung tulala at mulala!

 Kasukal ku lub, kamua kung kamua, uling ketang lugal kekaming pupuntalan, kekami nang disan. Mimasmas ku isip, mibali’ku diwa, ketang ing dalaga kung mumutya, kabira-bira… iyang mitambad kayarapan ku!, Tiniman ya kanaku, at aku mu namang tiniman kaya king mipmung yubu’t yumu. Ay! karagul a bage, kasanting ning pakiramdam ko, uling pusu ku lalu yang miyuyu…lalu yang kinarug…lalu yang linuksu! Kalagu na ning dalagang kanaku mekabigani! akung sasabi king kanakung sarili.

Mikawani kami pintalan, dapot, ing kanakung sarili lalu ku yang ali a wari, pauli niting pusu kung megani. Iti lalu yang minanga, lalu yang milsinta, at maninap king ing sana, itang dalaga, akit ku yang pasibayu! 

 Miras ku ketang tuknangan a kanakung panintunan. Akung masayang selubung detang kanakung kayabe at tiru itang maging tudturan ku. Karela lang mengutang kanaku nung aku lang balu detang kayagnan ku, at ali ing pekibat ku. Nandin karatang mung abak, ila ping mangutang tungkul keka, arang sinabi kanaku. Tau la Tarlac College of Technology karin king Tarlac, digtung da pang pasibayu. Nanu ya kaya lagyu itang abe dang dalaga? akung mengutang karela. Aba, tuturu yang Mathematics ita at Lolita Victorio ing lagyu na, at Lolit ing yaus mi keya, anang mekibat nitang metung kayabe ku. Kabiasna’na, mag-doctorate yang Statistics king U.P., maganaka na, kaluguran ku ya, anang mekibat nita pang metung. Paglolon me! paglolon me! buri mi ya keka! arang matingid aduan kanaku. Oy, Rodrigo! Eka mumuli keta kekatamu trade nung ala kang apalyari! arang mangulit kanaku detang babai. Mayli at pibabalugbug ku la mu uling balu ku, makadua mu, karin king trade school muli na kaming pasibayu.

 Makanyan man, i Lolit buri ku nayang akit pasibayu. Akung matula at masaya uling kakilalang-kakilala deya ding abe ku.

Kaybat nitang kekaming gamit mitangkap na, ikami nang mibalik seminar room, at bandang ala dos ning gatpanapun inyang pasibayu misundu itang seminar-workshop a gagawan mi. Abala ku king assignment a mitutuk kanaku at abala la ngan ding dakal makayabe kaniting seminar a mesabi. Silip-silipan kuya itang dalaga Tarlac dapot ali ku ya apagumasdan uling king dakal ding tau at abala lang mipanigaral karetang assignment makatutuk karela.

Karas nitang ala singku, mikawa-kawani na la ding tau at ume nang muling pasibayu karing karelang kuartu. Alang saken kanita, inya ding menasa kailangan maglakad la. Ikit kuya i Lolit kayagnan ding abe na at aku lang likuan detang kayabe kayagnan ku. Akung tinuki king karelang pamaglakad at kunwaring migpakilalang pasibayu ing ninu aku. Kanaku matula la at iyang inagape kanaku itang karelang dalaga. Makaba at miyaliwa itang karelang kuwentu. Mayli la mung mayli uli yatang pibabage at manintun lang talagang dalan, kanita, ikaming adua akua ming misabi. Iti kanakung ikakalugud at masapno nang ikakatula ning kanakung pusu uling kanakung paninap mididinan sese ampong lino. Ali miglambat, miras kaming matula ketang kekaming tuknangan at ikami nang migpainawa.

Kaibat nitang alus aduang oras, miglakad kaming pasibayu ban mapun na ketang kantina. Pasibayu, kinawani ku karing abe ku Baculud at ketang dalaga ning Tarlac karin ku migdatun at mekiyagnan. Tunggal ditak kaku yang akikilala’t ababalu at aku makanyan mu naman keya. Kayari nitang kekaming pamamangan apunan, miglakad kaming pasibayu kaibat nitang makuyad ming painawa. Madalumdum na kanita, at detang posting kekaming lalabasan, ala lang aslag uling kanita, alang kuryenti. Iting pamikatagun, lalung minye puge king kanakung pusu, inya kanita, detang kanakung kuwentu kaniting dalaga, lalu lang melabung at minyampaga. Bagya bagya, i Lolit mayli naya kanaku at ditak-ditak, aku nang manakit kilim ketang keyang lupa. Kalakalale, aku nayang apapatunud at detang mangalati nang timan kanaku, akakait ku na lang lalare ampong nenene.

Pasibayu, miras kaming matula ketang kekaming tuknangan. Akung memun karing kayabe nang Lolit, nung karela yang a panuala kanaku, kanita, ikami pang mipag-istorya. Marayil, uling mayan ing lub da kanaku, karela eku man mikaduan amanu. Karela yang penabilin mayap at ara pang memusit kanaku: E me paburen ing dalaga mi uling yapin ing kekang maging asawang painturu! Sesen muyang masalelse uling bage kayung bage!   Kekami yang kaluguran, inya keka yang ingatan!  Mayumu kung tinangu, patune, daptan kung dalise itang likuan dang panabilin kanaku. Matula kung matula karing bayung kakilala ku menibatan Tarlac uling palage la lub kanaku at king timtim ku, ing karelang dalagang kanakung tagimpan, balamu, buri da ya mu naman kanaku.

Aku yang inagkat lukluk ketang eran sementu itang dalagang kanakung pemun pakipagkwentuan. Kaganaka nang agkatan uling agad-agad, kayang pemintuan itang keya inawad ku. Linukluk ya dapot ing dayu na kanaku atin yatang aduang metru. King lub ku, mayli at masaya ku, uling mamyalungan king isip ku a nung makananu dumatun ya king siping ku.

 Ding batwin masanting la kanitang bengi at ing banwa malwalas at matunud ya. Ing bulan kilap-kilap ya king sala nang matina at ing kapadurutnan misisinagan ketang aslag nang misna tula. Uli ning Pasku malapit na, ing tiyup nitang angin mamyalungan na king dimla. Pablasang makatalpa’kami tukura’ning Bunduk Alaya, ing ambung dudulung manibat king banua, gagapang at gagale na king dimla. Ing sunis ding kuliglig sitsitsitsit at kulakulait, babie nayun king panimanman, babie santing king pakiramdaman, atnang kabage karing tulauk ding tuku ampong kulayo. Ing banglu ding sampaga, alimuyak waring manamuyut at kanaku mangamanu: Rodrigo, kekang samasan mamunting amanu, kanita, keka yang  apapalsinta ing masamyung Lolita…

Memuklat kung istorya, at e miglambat, memuklat ya namang kuwentu. Kanaku lang pipinpinan detang mabanglu nang amanu, at iya, titimtiman na la detang kanaku. Istorya na ing keyang pamagaral, kukuwentu ku mu naman ing kanaku. Eksplika nang pamanauru nang Mathematics, Counseling naman itang kukuwentu ku kaya. King balang sabian na, akung tatangu keya at king balang sasabian ku, ing tangu na anti mu rin ketang kanaku. Ala kaming pisasalangsangan, ala kaming pisasagsagan.

 Kabang pupulayi ya karing kuwentu na, tunggal ditak, akung dudusug ketang lele na. Dapot, eku binang makiramdam karetang kayang istorya, itang maragul kung tagimpan, iya itang akung mileleng milele ketang kayang pangisnawa. Uling e na ku binang balu, atnayang kalyap potang misisiping ku keya. Dapot, nung dusug na ya namang marayu, ketang galo na, kalakalale, tutuki kung pasibayu. Marayil, ikua nang sinawa ketang kanakung tiyaga, at ketang kanaku nayang kalele, akung manene ka ya sinabi: Eka tatakut, emu ku darayuan. Mayap kung kasabi. Maniwala ka king kanakung amanu, at ali mu isipan ing aku, malikut at marok kung tau… Dinuku at mipakayli ya, at ita, lubus mekasaya king salu ku. Manibat kanita, king siping ku, metunud ya, at meluat nang meluat ing kekaming kuwentu. 

Kaya ku la tiru detang kilap-kilap at masayang batwin at bulan karin babo banua. Kabang kaya lang pagumasdan, akung kaya mengutang: Balu muya itang kantang Vincent? Aku yang daramdaman pero eke masyadung balu letra, anang mekibat kanaku. Bisa ka istorya ke keka, akung sinabi kaya. Meyli at tinangu ya, at ume yang mekiramdam ketang makalunus nang bie Vincent Van Gogh. Tayimik na ing sabla liban na mu kekaming adua. King keluatan, ing balat detang kekaming gamat, tunggal ditak akakua da nang misasagana at miuuma. Itang kayang lupa, kalakalale akakait ku yang lalu pang sasala, at detang kayang pisngi at labi, kikinang na lang king lare at tula. Kaniting magani kung kabilyan, lalu yang malulumud king saya iting pusu kung manabiba. Marayil, alang ninu man ing magsilbing makapagpalino kanaku, a nung bakit iting pusu ku anti ya waring makatsubibu. Makayama iting pakiramdam! Makayuyut ing kanakung daramdaman! Mandilu ya king ligaya ing magtampiso kung pusu! Sari ya king kayan iting kanakung inawa! Biga ku waring makasangkayo babo dikut king taldawa! Ambun ku waring sanap-sanap king sepu ding amor seku! Kasanting ku pakiramdam! Kalagu ku panimanman! Ing pulayi ning oras, iti ali miya apansinan… ali miya apansinan… uling ing balang penandit atnang saya kekeng adua… at e mi apansinan…ganingaldo na pala!

Kabuklat ning abak, aku nang ginayak. Linual kung masaya, malwalas ku lupa. Ing kakung aske at ing malare kung kule, lalu yatang mibage keniting sisigpo at inspiradu kung pusu. Kabungad ku ketang pasbul, tambing-tambing, i Lolit na iyang pagdulapan ding mata ku. Ikit keyang makalukluk, mamangan, kayantabe detang masaya nang kaluguran. Matula keng linawe, masaya na ku namang linawe. Masaya keng pinepe, matula ya na mang minepe. Meyli ku keya, at kananku, tiniman yang atnang kayumu.

Makarine mang ukulan kening kanakung sarili, bakit balamu, mibangun yatang pasibayu, itang panamdam kung malsinta ketang kanakung kayanakan. Akung pang sasabi kening lub ku: Balamu, mamutikas at sasapo pasibayu iting kanakung pakiramdam. Isip ku, kening idad kung beinti nuebi at itang kaya beinti otsu, iting panamdam, ena makabage kening kekaming estadu. Iting malilyari lubus makatula, dapot kaniting pamikatagun, balamu bisa kung maniwala, ing panamdam pamalsinta king idad eya kikilala! Nanu ing daptan ku? Nanu ing gawan ku kening panamdaman kung e aintindyan?

Katlu at katataulian mi nang aldo niting kekaming seminar-workshop keti farm school king balen Magalang. Kaybat nitang kekaming almusal detang kaluguran ku Baculud, ikami nang melaus king seminar room. Bayu megumpisa itang mismung seminar, atin pa mung programang makuyad ing megampan, ban ding sabla, ilang magsaya at mikikilala. Bayu ya menyara itang tagapagsalita, inaus naya ing lagyu nang Miss Lolita Victorio, kanita, magparamdam yang metung a kanta. Minta ya arap at migkanta yang acapella pemagatan If This is Love Darling. Kabang magkanta ya, papalakpakan da yang atnang katni uli nitang bosis nang masanting at matarling. Rod pakibatan me ing kanta nang Lolit, arang misusubung ding kayabe ku Baculud.  Ketang karelang sinabi, migkule kung anting ange, uling king kanakung bie, deng kanta eku la balung igege. E na ka daratang keta kekatamu nung eka talakad at magkanta! arang matingid manyawad kanaku. Italakad me ing bandera ning Baculud! Patunayan mung ika tau ka Baba! ara pang mangulit kanaku.

Migparugu-rugu ku karela uling king tutu mu talagang eku biasang magkanta. Dapot, ara mung mekibat kanaku: Eka mangupeti…eka tatalyu…! Bayu ya mayari itang kakanta nang Lolit, tinalakad ya itang metung a kekaming kayabe, at kabud, keyang telanan itang mikroponu, pepakilala ing lagyu ku, at aku kanung pakibatan itang kanta nang Miss Victorio. Bista man, eku bisa, penulak daku detang abe ku, angga ketang dela daku ketang mabababg entebladu. Papalakpak la ding tau at ala nakung agawa, nune itang mamintu ku angga mung makapakananu. Kamarinayan a maragul nung ali magkanta ku, inya inggiang bosis ku sintunadu, kaku yang peramdam itang kantang Hindi Kita Malilimutan.  Kaburi, kasaya ring tau at king wari ku, atin lang balu ding malda kaniting tinubung lub ku kang Lolit apapalsintan ku. Kanyaman niting kanakung pakiramdam, at ala kung malit-malitan, lalu pa yatang mitawu at milablab iting tinubu kening kanakung pangatau.

 Kaybat nitang paugtuan, meyari at misara na ing atlung aldo seminar-workshop a kekaming gimpanan keni balen Magalang. Kalupa detang sabla, marapal kung tingkapan itang keganaganang gamit ku, kanita, makisake kung pasibayu karetang kayabe ku. Karetang kayabe ku Baculud, akung meki mayap lub pamu karela, kanita, akung makisabi at mamun kang Lolit a kanakung apapalsintan tutu. Kaibat nitang kekaming makuyad pamisabi, aku nang memun keya, at metung amanung maula ing pebakal ku keya. Akung masuging sinabi kaya: Potang mikit katang pasibayu, agkatan da kang kasal ta na. Iti, king buri mu at ali… Meyli yamu kanaku, dapot melutu yang alang nanu itang keyang lupa.

 Mikawani kami kaibat nita, at ala na kung balu nung kapilan mikit kaming pasibayu. Karatang nitang malalam nang bengi, masusi kung ukulan nung nanu ing kanakung daptan karetang amanu kung likuan kanitang dalagang kanakung akilala. Makananung mapalyari, makananung mipaltutu… uling lubus ali kami malalam pang mika-imbalu…e pa panaun…epa sapat ing kekaming pamikilala… akung sasabi kening lub kung mikakunu. King isip ku, iti buri ku nang kalinguan… uling ala namang kapuntalan…ala namang paintungulan. Iti buri ku nang ipilpil…buri ku nang kalinguan…buri ku nang ikutkut. Iti eku na buri pang isipan uling balu ku, kaniti, ala kung akarapat… ala kung apalyari. Dapot iti, nung kapilan ku iwawale, lalu na naku mang ilalako inawa niting kanakung sarili.

Kaybat nitang paruminggu, ati namang sulat ing kanakung tinggap. Iti pirmadu naya nitang CIRPS Executive Director at aduan ing malaguang pamanagun ning kekaming College President at aku mu naman, a maganap November 12, 1986 king Tarlac College of Technology, Tarlac, Tarlac. King tula ku, king College President Office migsarya ku, at akung mengutang nung makananu king Tarlac miras ku. Eku kanu migaganaka uling itang lugal karela yang kabisadung kabisadu.

 Metung aldo bayu datang itang kekaming pamunta king Tarlac, binuklat ku king kanakung college president at ketang kayang asawa, itang  lama’ning lub at isip ku. King wari ku, ilang mikakunung tangu ketang pamakyasawang isipan ku, uling ela piu ketang kaulia’nitang kanakung planu. Antimong kanakung matua, peisip da ing sabla kanaku, lalu na itang kayang maging bunga. Kanaku lang pakiramdaman, dapot, ketang penandit ita, bulag ya ing sabla kung pangatau.

Tutu ing sasabian ding aliwa, ing pusu nung malsinta ya, abubulag naya ing isip ning tau. Anti ya man kayapan ing isip, ing pusu abulag na ya iti, tuki at tuki ya ketang kayang buri. Ana pin nitang kasebyan, O lugud misna king upaya, potang keka yang sekupan ing pusu ning ninu mang tau, ing sabla keka ngang paimburisan matuki mu sana itang buri mung malyari.

Makanyan man, detang miyasawa, ilang mengakung saup ketang kanakung planu at nanu man ing malyari, pabustan ali daku.

Pablasang detang miyasawa maluat lang tinuru king Tarlac College of Technology at karin Tarlac manuknangan la, aku rang tiki ketang karelang saken, inya akung miras malagua ketang escuela, nung nukarin itang pulung magagawa. Akung magumasid king makapadurut kanaku uling nung e kanita, king balen Tarlac miras ku. Karing tau alus ala kung kakilala, puera namu, karetang dati ku nang balu. Kaluklu’ku ketang conference room, i Lolit na iyang panintunan ku. Nukarin ku man marap, alang Lolit ing akakit ku. Kalyap detang mata ko, maliswas ya itang pusu ku. Ing kanakung mabilug pangatau, manintun ya mung metung a tau, at iti, aliwa nune i Lolit a sinta ku!

 Ketang kekaming pulung misna ku king kainip. Lingo ku panimanman, sulasulapo ing kakung diwa. Pata yang isip ku, balamu, linto ku yatang lingo at tungo! Aku lang daramdaman detang sablang misasabi, dapot detang karelang maulang pisasabyan, kanaku ala ngang kabaldugan. Karetang kekaming pipulungan, nanu man, ala kung atandanan. Ketang maulang penandit a ita, metung ya mung bage ing buri kung malyari. Iti ya ing akit ku na i Lolit king ora mismu! Kakaba nitang oras, kakaba nitang pisasabyan, at nung magsilbi mu, itang oras kaku yang pamatakan, kanita, itang pulung midina’nang kawakasan!

 Salamat a dakal at ing pulung meyari na. Kabang ding sabla, king paugtuan masaya la, iting wawa ku naman mete ya panlasa. Kanyaman ing pamangan, lutu pa namang Kapampangan. Ala kung teginan, ala ku mang tikman, uling itang isip kung mamyalungan, i Lolit mu ing buri kung akit!

 Kaniting buri kung malyari alang ninu mang makibalu. Kapatad man o pengari, alang ninu mang mimisip keting luluban kung peligrosu. Kaniting penandit, ala kung kasaup, ala kung kamaganak. Aku mung magdili-dili, maliban mu pin king kanakung presidenti. Nanu man ing malyari kanaku, kaniti ala mang makabalu. Nanu man ing malyari, iti tanggapan kung manyaman. Nanu man ing kalwalan, iti kanakung tanggapan. Dapot, siguradu ku kaniting buri kung malyari… ala kung pikakunuan… alang nanung matsurang sasagi kanaku, alang nanung inisip ing aku mipariwara ku. Aku mang magdili-dili, dapot, akung maragul maniwala king kanakung sarili, ing Apung Guinu makasiping ya kanaku.

 Kaibat nitang paugtuan, ena ku likuan nitang kanakung presidenti. Kaya na lang peyaus detang sabla nang kaluguran. Kaya na lang kesabi detang makatua king escuela. Karela, akung na yang pepakilala. Matula nang pebalu’t sinabi karela, nung nanu ing palsintan kung malyari. Balu deya i Lolit nung nanu ing kayang ugali, balu deya pangatau, inya ila anti na lang pengari. Kanaku, ati’na lang dimdam dapot ita karangan mu. Kayakit da kanaku, miyasamas dakung tinimtim, at mayap namu naman, meging mayan la lub kanaku. Pablasang kanaku lang karaya anti mong Kapampangan, meging malugud la kanaku, at ilang migparaya ketang karela adwan ku.

I Lolit ausan yang malagua at pidungut lang adua ban ilang misabi, arang masayang sinabi. Memintu ya itang karelang tiburan, at ditak mung penandit, aku nang inagkat da, ketang bale ning escuela. Kinislap ku lupa ketang ikit ku naya in Lolit. Buri keng talanan…buri keng kaulan… dapot king tula ku, eku balu nung nanu ing kanakung daptan. Ing lupa nang Lolit kanaku yang pakasipatan…kanaku yang pakalarawan. King kanakung wari, iya man, ena na naman balu nung nanung keyang daptan. Wari ku, king masaya kung sarili, maluat ku na yang kakaburi, maluat ku na yang bandi, a eku ikit kilub nitang limampulung banua!  Ketang kayang luklukan, atneng kataimikan. E kikimut, malalam ya isipan. King wari ku, bisa yang tumulu lua, bisa yang mako uling pota mipasubu ya kening kadungut nang atna  ka-agresibu.

 Likuan da kami at misabi kaming adua. Dinatang ku ban tupad ketang likuan kung amanu keka, akung segiwa kaya. Ala yang bulad, ala yang nanu mang pekibat. E migluat anang manene mekibat: Eku tenam king lub ku itang kekang sinabi, balu ku mamiru kamu. Akung malugud sinabi ka ya: Dinatang ku uling laus ku lub at pusu, Dapot anang mikakunung migsalita: Emu mu ku lubus kakilala at balu. Emu ku kakilala.  Era ka pin mayap balu… era ka man mayap kakilala, dapot kanaku, pebalu naka ning Apung Guinu, at ika nakang tiru kanaku. Biyaya na ka kanaku at ika kanaku, akung malugud sinabi kaya. I Lolit mangalutu ya lupa, atnang sinabing pasibayu: Maglolo ka pamu kanaku, ban akilala mu kung tutu at nung ninu aku. Akung pasibayung mekibat ka ya:  Tukyan daka buri, dapot tukyan mu ku naman sana buri. Kasal ta na. Kasal ka ta pamu, ban kanita, itang buri mung suyuan daka, gawan kung mayumung-mayumu. Mipakayli ya kanaku, at lalu ya pang mengalutu. Lawan mu ing idad tamung adua, akung kaya pepaganaka. Beinti otsu ka, beinti nuebi ku. King wari ku, e makabage na, ing mipaglolo kata pang adua, uling ding tau, pagsistiyan daka ta pa, pauli ning idad tamung mamun na king kalendaryu, akung pang migpakayli kaya. Lawen mu ku mata…lawen mu ku lupa… deti manyabi lang tutu keka… aku pang maglolo kaya. Lawan mu la ding matua, lawan mu la ding kaluguran mu, metung at metung, alang ninu mang sasalangsang karela, akung manyawad pakibat kaya. Kaluguran daka at palsintan dakang alang sala, ika ing buri kung maging asawa, maging indu ning kakung familia… akung malugud susuyu kaya. Ali daka pabustan… ali daka paburen…ali daka pakyakan…at kapilan man, pakaluguran dakang pakaluguran…akung tutung mangaku kaya. Ala yang pakibat, ali ya bubulad. Makaduku ya lupa, bisa yang kumyak. Bisa yang miwas, bisa yang mako, dapot, ketang lukluka’na, kaku yang ginapus karetang gamat kung keya magparalampu.

Marayil, makiramdam at magumasid la kanitang penandit, detang kaluguran at malugud kaya. King sablang tula ku, akung ikuang mipakakama, ketang ing metung nang kayabe escuela, magdala yang marriage contract ayusan da na pala!. Eku balu nung magsaya at magdiwang naku. Ing pekamasanting a balu ku kanitang penandit, iya itang kasiping ku na yang kasiping, ing sinta kung painturu ku nang ayasawa!

Karing tau, matula kung matula. Inggia man era ku binang balu, maliswas at kikimut la, ketang upayang mikasal na kami maganap kanu king balen Victoria. Ding saken ning escuela geyak da la, at ding sabla mamirapal na la, uling ing silim daratang na. Ala kung balu nung nukarin dala daku, eku mu naman balu nung nanung malyari kanaku. Kabang ing kekaming saken pupulayi ya, inisip ku king kanakung sarili, ing metung ku waring gala gagato at tutuki king agus ning danum nitang malalam sapa.

 Miras kami ketang bale Victoria a bandi nitang metung ming kayabe. Akung mangapamulala king kanakung disan uling ing sabla makasadia na ngan king kasal a magawa. Ing secretaryu nitang minisipyu, kayang miyasamas mamakinilyan itang kontrata nitang kekaming kasal. Ding aliwa, atyu la kusina at maglutu lang miyali-aliwa. King kanakung saya, bisang tumulu ing kanakung lua! Ketang penandit kanita, bista man ala lu siping ku detang kanakung matua, ding sabla kikimut la para kanaku, gaganap king mipmung tula para kanaku. Pengari la waring kanaku bidbud ning Apung Guinu, a gagampan ketang sablang kailangan ku. Kalugud na ning Apung Guinu, at Kayang sidya ing dalan kanaku, kanita, ing kanakung malagung tagimpan makapamakiasawa, gana-ganang mipaltutu!

E megluat, dinatang na ya itang alcaldi ning munisipyu. Kaya yang linawe ing kontrata at lepita’na kaming pareyu. Kitangan na kami king kekaming pamikalugud, king kekaming kayadwanan bisang kasal, at pengamanuan ketang malagung pami yabe antimong miyasawa. Kaybat ning seremonya, kaya na lang pekiduang detang kekaming singsing, dapot, meyli kaming agnan-agnan, uling kareti, ala mu mang makasadia. Lubus nang aintindian ing kekaming kabilian, inya, ing itang lagyu na, keya nayang pinirma ketang kontrata ating petsang November 12, 1986. Nganang sinabi kekami: Ngeni miyasawa nakayu! Linawe naku at nganang minutus: Ngening ikayung adua, ikayu nang miyasawa, uman mu naya ing kekang asawa tanda ning lugud mu kaya.  Malugud kung memintu at telanan gamat ing kanakung asawa, at akung kaya mekisabi: Mrs. Sicat, malyari dakang uman. Linawe nakung misnang sala, at kaku yang inuma. Detang pago na kaku lang telanan, linapit ku kaya itang kanakung pangisnawa, at akung digpa labi karetang keya. Iti kaku pang inulit, at kaku yang kinaul. Katula ding manakit, kasaya ding sabla… at ngarang sasambitla detang aliwa: Kasanting ne…ngeni ku pamu menakit king anti kanyang pamiyasawa. E la man lubus mikilala, dapot ing karelang pamikalugud, daig na pa itang mipaglolo lang aduang pulung banua…!

Matula la, masaya la ding sabla kaniting pamikatagun. Masaya la kekaming miyasawa, lalu kanaku, uli ning katuparan nitang panalangin kung makapakyasawa. Pengaul da kami at malugud manalangin king Apung Guinu, itang ikulub na kekami ing Keyang bendisyung mayumu.

Kaybat nitang kapasalamatan, mibali’kami Tarlac ban yatad kaming miyasawa ketang bale ning kanakung asawa. Nung nukarin makatungnang ya, kaniti ala kung kabalu-balu, uling kapilan man, eku pa miras keta karela. Mu naman, eku la balu detang maging katuwangan ku, uling misan man, eku la pa ikit king mabilug a bie ku. Kapilan man, ala pang pamikatagun ing ikit ku la, at ila, makanian mu naman kanaku. Munaman, ala kung balu karing maging bayo ku. Ala kung balu king ugali ra, ala lang kabalu-balu mu naman kanaku. Akung mangutang kening kanakung sarili: nanu kaya ing kanakung kaulyan karing taung salagpian ku? Tanggapan da ku kaya o ikawani king kanakung asawa? Nanu kaya nung era ku buri? Nanu ing gawan ku nung arang itabi daku? Makanian man, panalangin ku king Apung Guinu, ing sana, maging mayan la lub kanaku, ali la salangsang kaniting kekaming pamiyasawa niting kaluguran kung asawa.

 Ding pamilya ning kanakung asawa aku lang akilala. Pablasang i Lolit pangane ya karing kapatad na, alang pepakit malulam lupa karela. Marayil, magtaka lamu nung makananung minuli yang talasawa iting karelang kapatad, uling ala lang kabalu-balu kaniting asawang tikya’na. Akung pagumasdan itang kimut nitang babai kung , nung nanu itang kayang daptan. Akung magumasid ketang balang sasabya’na, nung nanu ing gawa’na. Kanaku yang dimput itang malyap a gamat na, akung siniklaud, at linikluk alang bulad.

 Detang matua kekami mamantabe, ilang ka ya mekisabi. Eya bubulad, mangisnawang atnang kalalam. Maliswas ya ketang lukluka’na, ena balu nung nanu ing dapta’na. Marayil, bisa yang kumyak, bisa yang gulisak. Mekad, buri nakung itabi uling ena ku balu. Siguru, isipa’na, nung nanu ku pangatau, uling balamu, singo kung payung-payungan bigla na mu linto. Marayil, ikukutang na king kayang sarili nung bakit mipakanyan ya sukad ing anak a pakamala’na.  Marayil, masukal ing lub na, mua yang mua uli ning gewa ming adua. Marayil, ing sukal nang lub buri nang ibugnus, dapot, iti ena agawa uling detang matuang makayantabe kekami, kaya ali la aliwa. Deting kekaming kayabe mangatua, ilang kaya minye patutu, king i Lolit, eya misala king kayang pamakyasawa. Deting matua a kilala at balu nang tutu, minye la pang mayap a garantya, king ing asawa ning anak na, maganaka at mayap ya.

 E miglambat, memu’na la detang kekami minantabe. Migpasalamat ku karela at akung pengaul at pengalamanu. Aku namung dili at akung mimiiisip nung nanu ing tutuking malyari. Tunggal-tunggal karela, aku rang kukutnan, keta marayil, abalu da nung nanu ing kanakung pangatau. Makibat kung kalakalale, at akung magpatune, ing aku mayap kung tau, at munaman, maging mayap asawa king kapatad da. Tayimik ya mu ing katuangan kung babai, at king wari ku, ing isip na mamyalungan yang sari-sari. Kanaku yang panintunan itang katuangan kung lalaki, dapot iti ala yu kanita. Kaybat nitang mapilan penandit, sinabi ya itang kanakung katuangan at ikami na kanung magpainawa 

Akung tinuki king kanakung asawa, at kayang tiru itang tudtura’na. Tayimik ing sabla at ali kami bubulad adua. Kanaku yang lepitan, at kanaku yang pekisabyan. Kanaku yang pengutnan kaniting kekaming desisyun. Ala yang pekibat, ali ya man binulad. Mebasa ya mata a ginapang karetang keyang lupa. Kanakung pinulis iti, kanita, mapawi itang lumbe na. Kaku yang inaru, kaku yang sinuyu. Amanu kung mayumu, ilang kayang meging panulu. Pasibayu, akung kaya mengaku: Kaluguran da ka! Pakaluguran da kang sari yumu’t sanke king mabilug kung pangisnawa! 

 Ketang benging ita, biglang dinatang ing lisangan. Uli niti, ing uran mibulus misna king kasikan! Ala kang damdaman nune itang byung detang malabung kawayan. Kasanting pakiramdaman detang karelang mipapaspasan bulong. Kasanting pakiramdaman detang lalangitngit dang impun. King eku balu, ing uran mesikan pang lalu. Merimla itang angin, mipatudtud kung atnang santing. Kalingat ku ditak saglit, akung tinalakad at migumasid. Pagtakan ku at nung bakit inggiang angin marimla na, itang bugsu nitang uran mibulus pang pasibayu. Kalabas nitang uran, milako pasibayu itang singo nitang lisangan. Uli niti, akung mipasno pakiramdam at akung mipatudtud eku balu.  

Kayabak kagising ku, makatando na ya itang aldo. Panintunan ku ya ing abe ku, ita pala ya nang maglutu. Tinipa ku’t lepitan ya ban saupan king gagawa’na. Ginulut yang katuangan ku, a nandin kasabi na pa. Lingu’nang pipia’na alang bulad kukusut na. Sukal nang lub aintindyan ku, inanakit na kakung alalasa. Mengan kaming alang bulad, ing pamangan ku anti waring ating panulu.

Kaibat nitang kekaming almusal, ikaming memun miyasawa ban muli Pampanga. Ikaming muli keta kekami, kanita, kaya na lang akilala detang kanakung partidus balen Kababan. Itang kanakung katuangan, ala ya pa muring bulad, ala yang tangu, ala yang kasaya-saya lupa. Ginaya’kami’t memun kaya, at pasibayu, anti waring ala yang dimdam, anting alang ikit, itang malumbe kung katuangan. Meko kaming alang bulad at ume nang melaus. Ita kanung kalako mi, ing malungkut kung bayung pengari, menangis yang alang nanu. Itang imalan pipiya’na, king gabun penugse na. Ala yang asalese uling itang lub na ala yu ketang gagawa’na.

Menabat kaming saken at melaus na. Kalukluk mi kaniti, kaku yang telanan ing gamat ning abe ku, patune, tutu yang maula kanaku. Kaku yang kinaul ban maluluglug ing sabla nang pikakunuan. Ketang kanakung pago, kaku yang sinandal at mipatudtud king salu ku. Kabang kaku yang aguran, miglakad ya ing kakung diwa at kanakung isipan nung nanu ing kayulian niting kakung aluban. Akung mangutang king kanakung sarili: Nanu kaya ing dasan at sabian detang pengari’t kamagana’ku. Aku mu naming isipan, itang kanakung kabilyan karing painturu kung kapatad ngeni kanaku papagaral.  Nanu kaya ing daptan ku ban kanita king karelang pamagaral  e  mituknang la? Nanu kaya ing karelang kaulyan ngening aku nang talasawa? Nanu kaya ing gawan ku nung sakali, iting kanakung ayasawa, maging maimut ya karing obligasyun a likuan ku karela? akung mangutang kanitang isip kung mamyalungan.

 Balu ku king kapilanman, era ku dininan obligasyun detang kalulu kung matua, ban tambayukan itang karelang responsibilidad karing kapatad ku. Dapot kilub ding pusu ra, balu ku nung nanu ing yawad ra kanaku, lalu itang indu kung babai. Pengaku ku king kanakung sarili, king nanu man ing malyari, eku magpabusta kapilan man karela.  Deti mamyalungan la king kanakung sarili, at akung taimtim menalangin: Nawa iting kanakung ayasawa, keyang tanggapan iting kabilyan kung kalulu. Sana, maganaka ya’t mapanupaya, maragul a pusu, at mapanatindi king sabla…

Kalabas itang metung oras at kapitna, king baryu mi Baba miras kaming manawa. Katipa mi ketang saken, masaya kuyang kakalwan ing abe ku. Balang kekami manakit, ilang mangapatalanga at mangapakamakama. Ding sabla mangapamulala la kanaku, uling sinaguli ku mung mewala, aku nang magdalang asawa era man kakilala at kabalu-balu. Ating metung matuang babai kanakung kakilalang-kakilala ing linapit atnang memiru’t sinabi: Oy Rodrigo, mamulang! nukarin me labuad akalap ing kekang pisitara? Guinu ko! Bakit pekadagul dagul meng anti kanyan? Agiyu meng pamatbat yan at mekad galang ikang penasiwas na kanyan!  Kaku yang kinaul itang matuang babaing kapamiru ku at akung mekibat kaya: Iya ing asawa ku at Lolit ing lagyu na. Ali kami migpusitara uling kinasal na kami Tarlac. Nanu malagu ya ing abe ko? Nanu bage kame? Apagmaragul kya dara? Anang mapamiru pang sinabi: Taksyapu mo! E wari misasabi ka ta pamu kapilan pa at ala naka mang anti kanyan istorya kanako? Bakit kabira-bira aliwa yang abe mu ngeni?  Nanung gewa mung yan, itung? O itang balu ku, makananu ya kanyan? Akung mekibat kaya: Talagang ing suerti anti kanyan. Emu man panintunan, kabud na mu daratang… Kaya, akung minulit pasibayu keya: Nanu malagu yang abe ko? Wa naman! anang matulang mekibat kanaku. 

Itang kaluguran kung matua matula ya kanaku uling ume nakung mekapakyasawa. Ikami nang mumun kaya, at uling pare-pareyu kaming matula, ing kekaming pamaniklaud, kanita mi pamu aganaka. Itang kayang pitalan-talan sigarilyung markang ungut, keya yang sinubung pasibayu, aku nang pinikpik pago at anang memirung pasibayu: Rodrigo, ito, karagul ning arakap mo! Siguradu kang agyu me ing asawang darala mo?  Kaybat ku yang kinaul pago itang kapamiru kung matua, linakad na kami ning abe ku, pauli keta kekami.

 King kekaming pamanuli, balang bale kekaming lalabasan, kekami la pa mung ampitan. Matula la king abe ku, dapot ali da ya man masyadu pang balu. Matula ku karela, uling metung mu ing karelang kukutang kanaku: Rodrigo, ninu yang maragul abe mu? Obat e mi ya kakilala? Migpusitara kayo? Balu nang inang mu yan?  Kalupa nitang pakibat ku karetang aliwa, akung karela magdeklara: Mekyasawa na ku! Kinasal na kaming huez king Tarlac. Pablasang balu dang mapamiru ku, ada pang matulang sasabing paulit-ulit kanaku: Kamulangan mo! Eka mamiro. Makananu kang kinasal nung ika mung dili mu?  Makananung milyari ita. Bakit ali mi ya balu ing asawa mu? Bakit nung e ngeni, emu ya pepabalu kekami? Akung makibat karela: Suwerti ke ing abe ku. Eku la balung pakibatan deng kutang yu. Ala kung balung pakibat uling ala kung balu. At ara pang mangutang e maybug manwala: Ay Diyos ko, atin waring pamakyasawang anti kanyan! Itang metung bigla nang aganaka: Wa pin pala, menga’nako kanyan? Eko danupan? Nanu ing buri yung kanan?  E mi na la buring abalan pa, inya ikaming memun at sinulung na.

Karas mi ketang bale nang apu ku, lalu lang migtaka at mengapamulala. Minuna mi yang lepitan itang apu kung babai, at anang mengutang: Nanung milyari? Memusitara ka kano? Yang milyari balu nang inang mo? Inabut miya ing gamat na at ikaming meniklaud kaya. Kinasal na kami at darakitan da ka yu ban kanita magsulisitud tamu king aldo makadua, akung mekibat kang apu ku. Anang sinabi kanaku: Makanyan pala, bakit kailangan tamu pang magsulisitud, kinasal na kayu pala? Akung migpalino pa: Kanita miras kayu karin at kanita, akilala yu la ding pamilya ning abe ku.

 Itang apu kung lalaki makiramdam ya pala kekami, aku na yang inaus at pepalapitan kaya. Itang gamat na kekami yang kingua at siniklaud ka ya. Uli detang kayang mata lula na la, ali na ne akakit ing kanakung asawa. I Lolit pepalapita’naya kaya, at kayang kipkap ing lupa ning apu nang bayu. Anang sinabi kanaku: O Rodrigo, makananu meng arakap ing asawa mu? King wari ku, karagul na yatang babae! Obat eku balu ing ating ka palang kaburi Tarlac. Pasalamat ka’t aburya’na ka. Kang apu ku, akung sinabi: Apo, eka migkamali. Maragul ya ping tutu. Binie ne kanaku ning Apung Guinu, inggiang eke mipaglolo at masyadung mikabalu… Nanu ya itsura? ana pang sinigunda. Arang agnan-agnan mekibat detang makapadurut kaya: Malagu ya at lupa yang abugada.  Alus kasindagul neng Rodrigo, o mekad siguru, matas ya pang ditak ka ya.

 Ding aliwa minyasat la kabang mipag-istorya kaming masaya. Detang sablang makabalita, karas da, metung mu ing ikukutang da: I Rodrigo mikyasawa ne kano? Tutu ya ping maragul itang keyang ayasawa? Anta yu na la? Potang i Lolit iyang akit da, atna lang katulang katula at alang patugut ing ayli ra. Aba! tutu pin pala. Dagul napin pala ning asawa nang Rodrigo! arang masiglang magsalita.

Marayil, ing mangye dang pamagsalita ding tau, pagtaka’ning abe ku. Karing magale at matarling bosis ding tau, iyang manibayung-manibayu, uling nung e kanita king Lubao miras ya. Nung misan pangutnan da ya dapot mayli yamu uli sigurung detang aliwang salita gagamitan da, ela malino ketang balu na. Maralas mangutang ya pa kanaku, kanita, karing pakibat na eya mitalabu.

 Keta kekami, aku na yang inagkat ing abe ku, ban kanita, ka ya na lang akilala detang pengari nang bayu. Dapot e na kami buring mako pa mu nitang apu kung babai, aku nang ginayak at ume na kaming memun karela. Uling pepanyasat ya karetang kakung dara, ka ya nang penabilin ing eke kanu mamabak, nung e daratang itang pamangang payatad na. 

 Melaus na kami pauli karing kanakung pengari. King dane mi, mabilis mibalita ing mikyasawa naku. Balang kekaming daralanan, anak at matua, masaya la ngan lupa. I Sir mikyasawa na ya! Mikyasawa na ya! arang magsaya’t manabiba. Balang bale labasan mi, papalakpak at pepepe la. Abe ko, mikyasawa na ka pin pala! Tutu pala ing babalita ra at maragul ya pin pala ing arakap mung asawa, arang sasabi deta kekami akakasalubong.

Karas karin king bale mi, ikami rang selubung detang matulang kanakung pengari. Karela nang dimdam itang balita, balu da nang mikyasawa naku. Meniklaud kami karela at kinaul na yang inang ku ing abe kung asawa. Masaya la at ala kung dimdam nanu mang amanu karela. Detang kapatad kung atiyu kanita, kanaku lang pepakilala kaya. Matula da yang tinggap, at masaya lang mipagkuwentu. Tunggal-tunggal lang daratang detang kekaming kamaganak, siping bale ampon kakilala, at ilang sasalubung at magpakilala king kanakung asawa.

Detang likuan ming menese karin bale nang apu ku, ila nang dinatang at daralan itang karelang a lutu. Matula kaming minabak, masaya kaming pare-pareyu. Marakal ing pamangan uling detang kekami pupunta, magdala la mu namang pamangan miyaliwa-liwa.

 Kinabukasan, itang apu kung babai ketang tatang ku, a manuknangan pamu king pangulu, malagua yang dinulung king kekaming baryu, kabud kaya nang abalu, ing atin yang bayung apu. Marayu ya pa, susunga na yang mamaus, susyo kang tatang ku, at kaya nang ikukutang nung ing apu nang Rodrigo mekyasawa na ya kanu. Atna kaming katula kaya uling nanu ya pidala-dala. Meniklaud kami kaya at kayakit na king abe ku, kaya na yang penuma at kang Lolit tala-talanga ya. Katas na pin pala ning asawa nang Rodrigo, anang matulang mamanga. Masasawang ku kaya. Karagul na pin pala ing asagmit ning apu ku! ana pang masayang sasabi. Linual na king bayung itang darala na at pemilit mangan ing kanakung asawa.

Itang pangane kung kapatad manuknangan king Menila, iya mu namang minuli king baryu kayabe itang kayang asawa. Nung makanu itang tula detang aliwa, itang kaya anti mu naman kanita.

Detang aliwa kung disipulus a kanakung meging kaluguran, ilang dinatang mu naman at ilang sisigpo king tula pauli niting kanakung pamakyasawa. Matula ku karela, uling ila anti waring kapatad at wali ku na la.

Itang aldo Dumingu, ikaming sinimba at alang e makalawe king kanakung abe. Kaibat nitang misa, alang e gagalamu kanaku uling aku nang talasawa. Maluat kung tuturu baryu, inya ding tau mayap dakung balu, at king kekaming pisamban aktibu kung aktibu.

Bayu kami minuli keta kekami, patingapun kaming meniklaud karetang kekaming kamaganak aliwa pa. Balang kekaming darasan, atin lang yapag pamangan a labis nang ikakatula niting kakung asawa. Lubus nang isipan ing makayaliwang ugali ding taung kayang darasan, at munaman, ing leparan detang kanakung kamaganak. Pagtaka’na mu naman, at nung bakit balang bale kekaming ampitan, papadalan da yang nanu-nanu. Iti kanakung pepalino kaya, nung bakit ding Kapampangan Kababan anti kanita ing karelang panugali.

Itang benging dungut-dungut kaming mamangan ding pamilya ku, akung sinabi karela ing kekaming pamunta king Tarlac, kanita, itang kekaming kasal king pisamban, iyang kekaming pisabyan. Kekaming pisabi nung ninu ding tuki ampon nanu ing dala mi.

 Kabang mamangan kami, anang aganakang mengutang nitang babai kung wali: Koya, nuya mibait i ating? Nanu mo ing aus mu kaya ngening asawa mu naya? Nanu ing buri-buri nang kakanan? Nanu ing buri nang kule? Ninu reng buri nang magkanta? Nanung kanta ing buri-buri na?Nukarin ya megaral? Nanu ing aldo ning keyang beitan? Nanu la lagyu ding kekang katuangan? Pilan lang mikakapatad, nanung lagyu ra? Nanu ing lugal da Tarlac?

 Kabang mangutang ya itang kanakung wali, akung mimisip malalam nung nanu ing pakibat ku kaya. Aku yang lalawan i Lolit at akung mipapakayli king kanakung sarili. Ikaming adua, pusit-pusit ing kekaming ayli, uling king mipmung kamatutuanan, ala kung balung ipakibat…ala kung kamalayan… at ala kung kabalu-balu karetang ikukutang na nitang kakung wali.

Akung minamin karela:  Eku biyasang manula, inya ikayu nang manupaya. Ikayu na ing bala uling ala kung balu-balu karetang buri yung abalu. Arang agnan-agnan sinabi kanaku: Ay koya, obat makanyan kang mikyasawa, makatula kang tutu, ala ka kabalu-balu king kekang asawa!

 Malakas kaming meyli at karela kung sinabi: Talagang ala kung kabalu-balu, dapot, i ating yung Lolit iyang masanting nang regalu ning Apung Guinu kanaku, malagung regalu kapilan man, eku baren king mabilug bie ku…

 Manibat kanita, aldo-aldo… bengi-bengi… ala kung gewa nune tupad karetang kanakung pengaku king kanakung asawa. Alang penandit ing eke paglolon… susuyuan…luluguran… inya pin yata, king balang banua manganak ya!

Aduang pulung banua na ing milabas, at ing kanakung lugud keya, lalu pang lalam…lalu pang sasakdal…lalu pang babanal…lalu pang maging sagradu.

Nung makananu kung minuling talasawa, iyang kalam maluat kung penalangin king Apung Guinu. Milyari ya iting malagu kung pamakyasawa, pauli ning lugud ku Keya at lugud Na kanaku.

 

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s