King Kanakung Pamagtua

King Kanakung Pamagtua
(Sulat nang Inang at Tatang)
By Rodrigo M. Sicat

King kanakung pamagtua, aintindian mu ku sana
At aku mu kung ipanupaya

Potang ding kanakung mata, ila na lang malulula
Kareng pinggan aku nang makabalbal na
O kaya aku nang atutuag ing sabo babo lamesa
Emu ku sana kakamuan pauli ding gamat kung mabule na

Matua na ku ana’ko, inya, bina na kung mapanamdaman
Atna kung kalunus kening kanakung sarili
Lalu na rugu potang aku mung bubungilan
Kakamwan at gugulisakan

Potang mayna na la ring kanakung balugbug
Eku na lubus atitingiran ing kekang sasabyan
Sana, emu sasabyan kanaku ing misna ku king keklakan
Nung magsilbi sana, keka namung ulitan
Kanita, itang buri buring pabalu kanu itang aytindian

Anak, panaupaya mu ku
Uling taganang matua na ku
Potang mayna na la ring intud ku
Pagtyagan mu sanang saupan kanita mitikdo ku

Kalupa na wari ketang akung antabayanan ka
Ketang pamagpatalan mu
Tatalnan da kang kalakalale
A meging mula ning pamaglakad mu

Panupaya mu ku sana nung madalas kung maging makulit
Uling ing sasabyan ku waring plaka na mung paulit- ulit
Pakiramdaman mu na ku mu
Eku sana maging pikatulan keka
Eka sasawa, pakiramdaman mu na ku mu
Kareng anggang sasabyan ku keka

Anak, atatandanan mo ketang malati ka pa?
Potang bisa kang lobo, paulit ulit mu iting sasabyan kanaku
Papatingapun ka king kakakulit anggang iti eme apasali kanaku
Itang sabla mung kakulitan, kanaku la ngan pagtiyagan
Uli nitang lugud ku keka atnang sakdal at kayumu

Panupaya mu na sana ing kanakung bau
Babau na kung matua, gabun na ing bau ku
Emu na ku sana pipilitang mandilu
Uling keng dimla mayna na ya ing katawan ku

Malagua nayang misakitan ustung iti yang mikarimlan
Detang sakit ku pang aliwa
Kabud a bud lunto la naman
Anak, sana kapilan man, nung masakit ku
Emu ku sana pandiryan

Atatandanan mu pa ba kanitang anak ka pa?
Pagtyagan da kang panagalan
Ketang lalam nitang kekang pitutudturan
Eka bisang pairakap
Eka bisang mandilu uling pota misakitan ka

Panupaya mu sana nung madalas magbugnut ku
Uling siguru dadalan niti ning panga-katwa ku.
Potang tumua ka, abalu mu rin ini
Abalu mu ing masakit panamdaman ku

Potang atin kang ditak panaun, mipag-istorya ka ta sana
Angya rugung saguli mu
Kanita mawala bagya iting lungkut ku

Mainip ku king bale
Patingapun kung magdili-dili
Ala ku mang akasabi
Maliban mu karetang kakung muni-muni

Balu ku ing dakal ka gagawan king obra mu
Dapot buri ku sanang iparamdam keka
Ing atna kung kawang-kawang akapag-istorya ka
Angyang balu kung eka man interesadu
Kareng kukwentu ku keka
Akakait da ka mu, mipapasno ku

Anak, atatandanan mu pa ketang malati ka?
Pagtyagan da kang pakiramdaman at paki-intindyan
Karetang pautal-utal at paputut-putut mung kwento
Lalu na tungkul ketang teddy bear a pyalungan mu

At nung sakaling datang na itang pamikatagun
Sakaling misakitan at mirate na ku king kapanamdaman
Ali mu ku sana pagsawan keng kalulu kung kabilyan
Sesen mu ku sana ampong lingunan
Kanita rugu e ku lunto kalulunusan

Panupaya mu naman sana
Nung king kanakung pipagkeran
Mangapali o magdinat na ku naman
Pagtyagan mu ku sanang lingapan
Angga man sana king tauling penandit ning bie ku
Tutal, anak, karangan nya mu iting bie ku

Potang datang na ing aldo ning kanakung pamaglako
Talanan mu ku sana gamat
Pasiknangan mu ing lub ku
Kanita ayarapan ku
Ing kanakung kamatayan

At eka migaganaka, anak
Bayu ku la ipakat ding kanakung mata
Ipanalangin ku king Mayupaya
Ing ipala na kang manawa
Uling meging malugud ka
Karing kekang inda at tata.

One thought on “King Kanakung Pamagtua

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s